This article will be featured at the awesome feminist zine, SAWT AL NISWA bloghttp://www.sawtalniswa.com/
كان عبالي أعمل هيدا البلغ بالانجليزي أهين عليي من إكتب بيملي وصلح كل ٥ دقايق بس لأ حسيت إنو ط إقدر خبركن بالحرف الواحد عن علاقة المجتمع مع جسمي. ونعمه العلاقة, لازم إكتب بلعربي.
أول شي تا خبركن عن جسمي. أنا أمرأة ناصحة وبقول ناصحة بلا ما إعتبرها إهانة أو شتيمة. متصالحين أنا وجسمي ١٠٠% بلا مشاكل وتعب وهم. وجباتي كلن فين لذي بلا ذنب،وانهيارات الشوبنغ ويا ربي ما عم لاقي تياب على مقاصي تخطيتون من زمان. ذوقي واضح و بعرف المحلات يلي معترف فينا كعالم لسنا أبداً قياس ١ بهل بلد.
في أبسط من هيك و أريح؟ ما في، ولكن!
هلق تا خبركن عن علاقات المجتمع مع جسدي، علاقة قبح وذم. كل يوم بلبس وبدهر من بيتي المفروض اتوماتيكياً بلش برر لل عالم يلي ما بعرفن، ما بيعرفوني، وما خصون, ليش أنا بنت ناصحة! بعتذر يعني، بحب الأكل. بس ما تفكرو، تبريراتي بتبلش بجأرا، وايام بتخلص بكلمتين حلوين أو وعظه مثلاً ليش المجتمع عم بموت ويعيش كل يوم تا يخليني حس حالي بشعة إذا أنا ما كنت ع قياستوا؟ توفير قماش؟ ليش المجتمع بدو يقنعني بعد كل هل سنين إنو أنا مش حلوي وأنا يلي بعرف قديش الجمال نسبي؟ ليش المجتمع مصر يخليني حس اني غلط، والغلط الوحيد هوه إنو حداً يمس بحرية إختياري كيف اتصرف بجسدي؟
ما رح اتفلسف كتير رح خبركن. بخبركن عن مرة يلي نزلت في عل دكان وعباله بذر. طئش فئش. كتشف أحد سكان الحي ميلو إنو يكون حكيم رجيم وقرر بس إنو لأ ما تشتري بذر، بنصح. شكلي مكتوب على راسي إنو عم بعمل رجيم؟ مين الشب، سألت الدكنجي، بعرفك شي، كيف بطعتي لا حالك الحق أول شي تحكي معي تعملي وعظة، ونتبهو الزلمي أبداً من جغل زمانو ما عندو ولا سن بمطرحو، والأنكا إنو كرشو ادامو ٣ أمتار وما عم بالغ. هيدا اسمو HYPOCRASY ITSELF
ط خبركن عن التعليق اليومي يلي بسمعو من الناس يلي اهزب شوي، ولا يا دموزل وجك كتير حلو ليش عاملي هيك بحالك، نازعا حالك! أول شي كنت انأز، قول يا ربي معقول صدر عني شي أهان مستوى ذكايي، بعدين فهمت، أضحك، قول مرسي، امشي، ايام حسب المود، بحب أقهر، ما في متل البوظة طنت وعشاء عرمرم، أو لأ طنت ما معي غدي بحب بطني باكل كتير، حتى ايام، مرسي كتير، عم جريب انصح ٣ كيلو كتير مبسوطة إنو لاحظتو، وما في شي بضحك أكتر من حشريةٌ، إلا تعابير وجون المستغرب من الجواب!
بخبركن عن الوزوز يلي حتى أنا و اعدا بالسرفيس أعطى لا نفسو حق إنو يصرخلي عما بألبيك، شو هاي بقرة! ،ما لحقت جاوبو كان ماشي السير، بس بتعرفو شو بركي من الذريبي يلي هوي طالع منا هيك بغنجو بعض بالبيت!
بخبركن عن شوفور السرفيس يلي ستعمل وزني حجي ط ما اقعد ورى لأن أيدو ما بطال ل ورى وإئجرو ما في تحف ع اجري، وأتى رفضت إقعد ادام، وطبشتلو الباب وقلتلو مرسي بطل بدي، كيف صار يصرخ لل شوفر يلي ورا دغري وسيارتو نفس الحجم كيف أنا باخد مطرح راكبين : هي ناصحة هي بتاخد محل راكبين هيدي! هلأ كيف سعت مع هداك الشوفير أنا و-٢ حدي، عجيبه من السما.
ما بيخلصو خباري، في خبركن لل صبح، بس مش هيدا هدفي. ل كل بنت، بهيدا المجتمع يلي بكرهها جسما، بكل دعاية عل طريق، بكل مجلة، بكل فيلم، بكل نظرة وتعليق وتلطيش واهانه، بكل كلمت كتير حلوي بس لو بتضعفي ١٠ كيلو "سم بالدسم" حبي جسمك، كلمه كبيره، ومشوار طويل بس ط خبرك شي، ما حداً بيعطكي الحرية غير حالك، وحب جسدك هوه نوع من أنواع الحرية، وصدقيني، ما في أحلى من علاقة حرية وسصداقة وحب مع جسمك.
يمكن ما حدن خبرنا نحن وعم نكبر، إنو هيدا الجسم يلي نحن قعدين في هوه منو ملك البلدية، ولا الدوله ولا تنطات الصبحية، هيدا الجسد هوي أكبر جزء منا، وأحلى شي في، إنو هوه ملكنا نحن وبس. بربنونة تا نكرهوا كى نساء، نحرمو، نكبتو، ونقمعوا لأنٌ بخافو، بخافو لأن إذا نحن مش ملهين نضعف كيلو أو نضلنا مبروزين ناطرين كل الديني توافق إنو نحن حلوين وضعاف، يمكن نحن نوعا نفكر قديش حقونقا كنساء مطمورة تحت سابع أرض، ط ما نقدر نكون ازكيأ وط نكره حالنا ونضلنا شو ما عملنا نحس إنو نحن بشعين وناقصين، أو بالأحرى بشعين وزايدين كم كيلو عن المقبول اجتماعين . تعو نفكر سوى إذا نحن نصحنا بدون كره لجسدنا وبكل تقبل قديش رح تخسر شركات أدوية الدايت و اذالت ال سليلوت ، صدفه إنو ديماً البنات بهيدول الدعايات ما بيشبهو حداً بيناتنا، وما فين يشبهون ب درجت الكامل الفارغ، لأن هل كم كيلو الزايدين في فوتوشوب بشيلون وبحليون وبجلسون. قديش بدي خبركن إذا ما كانت اجرينا تعبانين من الكعوب كل النهار، فينا نفضا نفكر بوظيفتنا كعضو متساوي بالمجتمع مش حاصل على 10% من حقوقنا المفروض تكون حق حاصل. حتى نقدر نمشي أو بالأحرى نوقف وننزل درج بلا ما نفكش رقبتنا ، بس ط نبين "حلوين" قديش بدي خبرك عن إستغلال المجتمع لضعف السئة بالنفس يلي منرضعو مع حليبنا من نحن وصغار، وعن قديش بحطونا بعلب إذا سترجينا نطلع منا منطلع غلط وبشعين. راح وقف أحكي لأنو عنجد الحكي ما بيخلص. وبسلمك الدور أنت لأن عندك مسؤلية ملكية جسمك ط تبلشي تحكي، وتعبري بكل طريقة ممكنة عن حرية امتلاكك هيدا الجسد. وساعتا إذا بدك ضعف نصح وكوني يلي بدك يه، المهم تعرفي إنو صوتك عالي على قد ما إنت بتعلي ط يوصل, وإنو إنت حلوي عل قد ما الجمال نسبي، وعلى قد ما إنت بتشوف حالك حلوة.
ليوم أنا لما أضهر من البيت رح كون عم فكر قديش قنعتك تحبي جسمك، ولما إسمع وحده من هيدول التعلئيت الغبيي رح أضحك. فما تخيبيلي أملي :)
